Hjálp og algengar spurningar

Svör við því sem oftast er spurt um. iOS er á ensku á íslenskum símum, svo heiti valmynda og stillinga hér eru ensku heitin sem þú sérð á skjánum — með íslenskum skýringum í kring. Ef svarið þitt er ekki hér máttu senda okkur línu á GitHub.

Að virkja lyklaborðið

Eftir að þú sækir Lyklaborð úr App Store þarf að kveikja á því í stillingum símans — appið getur ekki gert það fyrir þig, iOS krefst þess að þú gerir það sjálf(ur):

1. Opnaðu “Settings” á símanum.
2. Veldu “General” → “Keyboard” → “Keyboards”.
3. Ýttu á “Add New Keyboard…” og veldu Lyklaborð í listanum.
4. Ýttu svo aftur á Lyklaborð í listanum og kveiktu á “Allow Full Access” — það er valfrjálst, sjá næsta kafla.

Flýtileið: á „Byrjun“ flipanum í appinu er hnappurinn „Opna Settings“ sem fer með þig beint á réttu stillingasíðuna — þar ýtirðu á “Keyboards” og kveikir á Lyklaborð.

Til að skipta yfir á Lyklaborð þegar þú skrifar: haltu inni hnattartákninu 🌐 neðst til vinstri á lyklaborðinu og veldu Lyklaborð. Þú getur prófað strax í textareitnum á „Byrjun“ flipanum í appinu.

„Allow Full Access“ — hvað þýðir þetta?

Þegar þú kveikir á “Allow Full Access” sýnir iOS staðlaða viðvörun um að lyklaborð geti sent það sem þú skrifar. Viðvörunin er sú sama fyrir öll lyklaborð frá þriðja aðila — og fyrir Lyklaborð er svarið einfalt: lyklaborðsviðbótin inniheldur engan netkóða. Ekkert sem þú skrifar getur farið neitt, hvorki til okkar né annarra — kóðinn til að senda það er ekki til. Frumkóðinn er opinn á GitHub, svo þetta er sannreynanlegt, ekki bara loforð.

Fullur aðgangur gerir tvennt:

• Appið og lyklaborðið deila sama orðasafni — orð sem lyklaborðið lærir birtast í appinu og geta samstillst dulkóðuð við þitt eigið iCloud.
• Titringur við innslátt virkar — iOS lokar á titring fyrir öll lyklaborð frá þriðja aðila þar til fullur aðgangur er veittur.

Lyklaborðið skrifar, leiðréttir sjálfkrafa og stingur upp á orðum að fullu þótt slökkt sé á fullum aðgangi. Nánar í persónuverndarstefnunni.

Lyklaborð+ á fleiri tækjum

Áskriftin að Lyklaborð+ fylgir Apple-reikningnum þínum (Apple ID), ekki tækinu. Á nýju tæki — eða eftir að þú setur símann upp aftur — dugar að setja appið upp og opna það einu sinni: áskriftin finnst þá sjálfkrafa. Ef hún skilar sér ekki strax skaltu ýta á „Endurheimta kaup“ undir „Stillingar“ → „Áskrift“ í appinu.

Skjátími (Screen Time) getur lokað á lyklaborð þriðja aðila

Ef “Screen Time” er virkt með “Content & Privacy Restrictions” — algengast á síma barns sem foreldri stýrir í gegnum Family Sharing, eða á vinnu- og skólasímum með stjórnunarhugbúnaði (MDM) — getur iOS lokað á lyklaborð frá þriðja aðila alveg. Þá birtist Lyklaborð ekki í “Add New Keyboard…” listanum, eða “Allow Full Access” er grátt og óvirkt.

Þetta er stilling í iOS, ekki galli í Lyklaborði. Sá sem stýrir tækinu (foreldrið eða kerfisstjórinn) þarf að slaka á takmörkununum undir “Settings” → “Screen Time” → “Content & Privacy Restrictions” — eða í MDM-stillingum vinnustaðarins — til að hægt sé að virkja lyklaborðið.

Að flytja inn úr SwiftKey

Lyklaborð getur flutt inn orðasafnið sem SwiftKey lærði af þér í gegnum árin. Erfiða skrefið er að ná skránni út úr skýinu hjá Microsoft — hér eru skrefin eins og þau eru í dag:

1. Í SwiftKey appinu: skráðu þig inn með Microsoft-reikningi og kveiktu á “Account” → “Backup & Sync”. SwiftKey vistar þá lærðu orðin þín í þínu eigin OneDrive.
2. Opnaðu onedrive.live.com í vafra (eða OneDrive appið) og skráðu þig inn með sama Microsoft-reikningi.
3. Farðu í “My files” → “Apps” → “SwiftKey”. Þar liggur orðasafnið þitt sem læsileg textaskrá. Sæktu hana (“Download”) og vistaðu í “Files” appið á símanum — t.d. í “On My iPhone” eða iCloud Drive.
4. Í Lyklaborði: opnaðu „Orðasafn“ flipann, veldu „Flytja inn úr SwiftKey“ → „Velja skrá“ og bentu á skrána.

Áttir þú gamlan útflutning? Microsoft lagði niður sérstöku SwiftKey-reikningana og gömlu gagnagáttina (data.swiftkey.com, „Download your data“) 31. maí 2026. Gamlar útflutningsskrár virka samt áfram í Lyklaborði — í ZIP-skránni heitir orðasafnið “vocabulary.txt” og liggur í möppunni “SwiftKey Keyboard/Dictionary”.

Innflutningurinn les eitt orð í línu. Línum sem eru ekki gild orð er sleppt sjálfkrafa, og orð sem þú hefur áður eytt í Lyklaborði verða ekki flutt inn aftur — þín eyðing gildir. SwiftKey-innflutningur er hluti af Lyklaborð+.

Endurgreiðslur og áskriftarstjórnun

Apple sér alfarið um greiðslur, áskriftir og endurgreiðslur — við sjáum aldrei greiðsluupplýsingarnar þínar og getum hvorki gjaldfært þig né endurgreitt þér sjálf.

• Að segja upp eða breyta áskrift: í appinu undir „Stillingar“ → „Áskrift“ → „Stjórna eða segja upp áskrift“ — eða beint í símastillingunum: “Settings” → nafnið þitt efst → “Subscriptions”. Uppsögn tekur gildi í lok yfirstandandi tímabils og ekkert er gjaldfært eftir það.
• Endurgreiðsla: farðu á reportaproblem.apple.com, skráðu þig inn með Apple-reikningnum þínum og veldu kaupin. Apple afgreiðir beiðnina, oftast innan eins til tveggja sólarhringa.
• Þótt þú segir upp: allt sem lyklaborðið lærði geymist óbreytt og bíður þín — og útflutningur gagnanna þinna er alltaf ókeypis, með eða án áskriftar.

Kóðar

Fékkstu kóða fyrir Lyklaborð+? Opnaðu appið og farðu í „Stillingar“ → „Áskrift“ → „Innleysa kóða“. Það er líka hægt í App Store appinu: ýttu á myndina þína efst í hægra horninu og veldu “Redeem Gift Card or Code”.